«Казан» ат спорты комплексы Россиядә генә түгел, ә Европадагы иң зур ипподромнарның берсе. 2006 елда комплекс чабышкы токымлы атлар өчен Дөнья кубогын кабул итте. Ел саен казан ипподромында Татарстан республикасы Президенты призына чабышлар уздырыла. Комплекс составында атта чабу юллары, каршылыклар урнаштырылган юллар, конкур мәйданы, атларны шөгыльләндерү өчен ике кыр, ат абзарлары, ветеринар клиника, атларны коендыру өчен кышкы бассейн, азык-төлек амбары, балта остасы, тимерче остаханәләре бар. Шулай ук комплекска килүчеләр өчен уен-күңел ачу зонасы булдырылган. Анда рестораннар һәм кибетләр урнашкан.